【天與地】8年前首播收視低卻高口碑成TVB一代神劇 重溫9大耐人尋味金句
TVB劇集《天與地》在2011年首播時，通過探討人性的陰暗面來展示倫理道德、善與惡、政治、宗教及死亡等議題。風格大膽的劇情評價兩極化，有觀眾認為劇集故弄玄虛，亦有人覺得《天與地》有別於一般劇集，是電視劇上一大突破。儘管《天與地》開播收視不佳，但卻贏得口碑。當中劇集的金句發人深省，一齊重溫下。
1：
葉梓恩：「今晚喺呢度，我呼籲警方、外邊嘅市民、所有傳媒，無需要恐懼我哋嘅聚集。因為喺呢度，每一個支持同追求獨立音樂嘅人，他們都代表住每一種獨立同自主嘅做人方法。呢啲並唔係唔和諧嘅表現。和諧唔係一百個人講同一句說話，和諧係一百個人有一百句唔同說話之餘，而又互相尊重。」
2：
劉俊雄：「你唔覺得呢個城市唔歡迎好人㗎咩？大家都只會接受一啲偽善嘅人，反而啲好人，佢哋會驚！」
3：
Dr. Dylan：「你睇吓我哋呢個世界，睇吓我哋呢個城市係乜嘢樣，除咗錢呢個字之外，我哋已經分辨唔出是非黑白，我哋每個人都被環境訓練到，好似倒模出嚟咁。鍾意食同一樣嘅嘢、鍾意同一樣電視節目、支持同一種政治立場，信奉同一種生老病死嘅做人方法。This city is dying, you know？」
4：
Dr. Dylan：「獨立嘅精神、抗拒建制、自由、愛、勇往直前，其實何止係Rock & Roll，我哋做人唔係本來就應該係咁嘅咩？」
5：
Rico：「無錯，大家而家聽到嘅嘭嘭聲，就係強權同制度下嘅代表，響建制下嘅當權者。佢地最恐懼嘅就係佢地管治嘅人唔聽話。但喺係外面既人有自己嘅諗法，有自己嘅主張；但係Rock & Roll嘅精神，就係講獨立嘅精神。我哋每一個人都係自己嘅主人，我哋每一個人都有權主宰自己嘅路黎行架！雖然今晚呢個show可能係非法進行，但係我哋唔會就咁屈服。Rock & Roll never die！Rock & Roll never die！Rock & Roll never die！」
6：
劉俊雄：「無論係香港定世界任何一個地方，政治世界就係污糟邋遢嘅世界，從政手段就只有卑鄙、奸詐，除咗呢樣，就只有更卑鄙、更奸詐。大家如果想得到公義嘅話，我可以話比大家聽，一個公義嘅人，絕對、亦無可能幫你哋達到目的。」
7：
何sir：「我上個禮拜睇立法會直播，議員又講錯字，又有懶音，又亂講英文，如果當日選咗你入去，娛樂性一定豐富得多。」
8：
葉梓恩：「點解人長大之後，就要咁多妥協，咁多考慮？咁多理由去面對現實，咁先叫正常咩？」
9：
劉俊雄：「香港人最擅長係咩？就係善忘，除咗錢，咩都忘記晒！忘記身邊所有一切，忘記舊樓、碼頭，忘記曾經喺街上喊過嘅口號。」
來源：《天與地》
圖：劇集截圖、廣告截圖
港生活人氣本地熱話
【免費送Rollink旅遊系列✈️🌍】
↓ 帶走人氣摺疊旅行喼 x Mini Bag！↓
↓【限時搶⚡】Lanluis MGO520+紐西蘭麥蘆卡紅蔘蜂蜜便攜裝↓
↓補氣血｜改善睡眠品質｜促進腸道健康↓
