（男人恥辱）【女朋友完全唔驚我去偷食】
文：藍橘子
有一日，我好無聊地問咗女朋友小豆一個問題。
「其實妳驚唔驚我出去偷食？」
「唔驚。」女朋友氣定神閒繼續玩手機。
不過咁，《我的少女時代》林真心講過，女仔話唔緊要即係緊要，話無事即係有事…咁佢話唔驚，係咪即係代表驚到成日都訓唔著呢？
「唔會嘅，我知妳驚嘅～咪扮嘢啦！」
「真係唔驚囉…」
「…」佢一定係呃我！
「驚啦！」
「唔驚。」
「喂…驚啦求吓妳…」唔知點解，我覺得自己越來越無尊嚴…
「驚乜鬼啫？！」佢終於放低部電話理吓我感受。
「唔係驚鬼啊！係驚我出軌啊！上次妳唔係同我講，妳個朋友拍咗八年拖而家仲係keep住一拖三咩？我可能而家一拖五都唔定呢！」
「痴線…你份人咁懶，又怕麻煩，我同屋企人返鄉下你竟然可以宅足喺屋企幾日。點會出軌啊？」點知，女朋友一開就收唔到口。
「你想一拖二咩？嗱唔好話我唔提你，你要成日刪除啲訊息，又唔可以keep相，出街又驚畀朋友撞到，又要諗點先唔會畀另一個撞到…嘩唔止啊！紀念日又要記兩個，生日日期又記兩個，兩個女仔鍾意食乜、鍾意咩色都要記㗎…」
女朋友仲加咗句：「你咁鬼無記性，邊日同邊個食飯，交電話費同信用卡數都係我幫你記，你記到咁多嘢咩？慳啲啦藍橙仔…」
「……」我無言反駁，的確我有咩飯局，都會叫女朋友幫我記低喺我間房個日曆，喺雙方都得閒嘅日子佢會自己加上『約會日』，基本上我係睇住個日曆做人…
唔怪得女朋友咁氣定神閒，因為佢實在太瞭解我…
我有種畀人睇小嘅感覺，不過諗深一層，偷食又真係好煩，大佬啊！我唔記得啲紀念日已經要被人擰甩個頭，仲要記兩個？！都係咪搞我…
女孩子怕男友會偷食，其實無得好驚，就算睇晒佢手機所有訊息，佢一樣可以用另一張電話卡。
但相對地，如果男友唔想畀人懷疑自己偷食，
就唔好做埋啲小動作，又鎖相簿、手機又關通知、又刪訊息…
仲有…可以考慮好似我咁懶同無記性。
本篇圖文獲作者藍橘子授權刊登，未經准許，請勿轉載！
藍橘子Facebook：https://www.facebook.com/BlueGodZi/
作者其他文章：
>> 右手係我女朋友
>> 點用電話最慳電？
>> 坤哥，一個努力的最好例子
港生活人氣本地熱話
↓【限時搶⚡】原箱高鈣梳打餅↓
↓黑芝麻 / 芥末味｜口感香脆、高鈣健康↓
【社群送禮🌸】送您麒麟一番搾啤酒及「和風櫻花禮品套裝」！
↓簡單一步登記贏禮物！↓
