仔女冇屬於自己嘅房對成長會有好大影響？ 網民熱議：冇房畀仔女住係咪就唔應該生？
香港地寸金尺土，每個人喺成長階段都未必可以擁有屬於自己嘅房、自己嘅獨立空間，而喺成長時期冇自己嘅房又究竟有冇問題呢？最近就有網民喺連登討論區上發文，指若父母提供唔到一間房畀仔女的話，就唔應該生小朋友，因而就引起一眾網民嘅熱烈討論！
冇自己房會影響發展？更會令仔女感到自卑？
樓主表示冇自己房等於完全冇私隱，生活上好多事情都需要將就，若與兄弟姊妹生活模式有分別的話，更會導致成日鬧交，並會經常盼望可以自己搬出去住，所以就認為如果父母畀唔到一間房自己嘅仔女的話，就唔應該生小朋友。對於樓主嘅睇法，有不少網民都表示認同，認為私人空間對小朋友發展有好重要嘅影響：「勁影響小朋友發展，無房真係唔好生」、「依個其實係要，去到中學個個都想要同需要有個人空間，剩係日常生活都會因為無房有碰撞」、「至少仔女到青春期就要俾返私人空間佢哋，人大個咗就唔會想幾時都痴(黐)住老豆老母，有陣時溫書都想有靜嘅環境啦」，更有網民認為仔女冇自己房的話可能會感到自卑：「點都起碼要有間房，生活水平要追得(到)大部分同學，而唔係一尾(味)要人慳呢樣做少果(嗰)樣去陪你捱窮，成長階段樣樣都人有自己冇會好自卑」。
有網民認為子女沒有自己個人的房間會影響發展，更可能會感到自卑。
冇自己房會有好多問題？會好影響休息？
有不少網民認同樓主嘅睇法之餘更表示身同感受，紛紛列出由於冇自己房對自己所做成嘅影響：「冇自己房真係好x慘，自已有時想要一個安靜既(嘅)環境都冇，打機要係(喺)廳到(度)打，同朋友打機講野(嘢)又要就住就住，夜啲又要安靜啲費事嘈到佢地」、「冇間房既(嘅)話，就算唔講私隱問題，休息得都唔好，我想休息果(嗰)陣又有人開大個電視機，冇野(嘢)隔(阻)隔嘈住哂真係好唔掂，溫書都係」、「真係，另一半話想傾電話都傾唔到，同佢解釋唔想俾屋企人聽到，佢又唔明咁話聽到有咩所謂，搞到我好似怪人咁」、「真係，細細個同個妹一間房已經成日鬧交」。
有網民就指出沒有個人房間對自己做成的影響，當中包括影響休息、影響與伴侶的關係以及經常會與家人爭吵等等。
要有物業甚至千幾萬畀到仔女先至好生？
而更有網民認為要有物業甚至有一千多萬資產預留畀仔女先至好生：「一間房？根本仔女大個比(畀)唔到層樓佢地都唔應該生啦」、「無樓生仔，真係禍害下一代，下一代必須做到比一般人努力、能幹，先有機會提升生活水平」、「無能力留到1-2千萬俾個仔or囡(女)都唔應該生啦，生得佢出， 就要俾到一個無憂無慮既(嘅)生活佢啦」、「留到一個full pay單位俾仔囡(女)，佢地最少唔洗(使)做奴隸追首期追樓價，有啲時間發展下自己興趣」，而有網民亦表示自己細個冇得到良好嘅培育，令佢就算長大後都感到自卑：「宜(而)家樓都買埋，但都係自卑，覺得其他人識好多野(嘢)好多才多藝，細個完全無錢join興趣班，遊戲機又無錢買，淨係可以係(喺)屋企睇電視」，不過有網民就認為唔一定要父母預留資產畀仔女，但最起碼父母唔好令自己成為仔女嘅負擔：「反而我又覺得唔洗(使)話要有幾多百萬幾多千萬留比(畀)細路，但最基本係預左(咗)唔洗(使)靠個仔養先好生，佢賺返黎(嚟)既(嘅)錢100%可以用返係(喺)自己身上/儲起，自己要有份醫保搞掂自己年老果(嗰)啲醫療成本」。
有網民認為父母應要預留物業或一千多萬資產給子女才適合生育，令他們可追求自己的興趣，得到全面的發展。
有自己房唔係必需？仔女不應抱怨？
不過亦有網民認為仔女擁有自己房並唔係必需，做仔女不應埋怨而更應該要知足：「你唔好攪(搞)笑啦，你呀爸呀媽個代細個都冇自己一間房啦」、「知足常樂啦」、「照你咁諗，上帝應該一人一個地球，上帝唔應該做人，死廢青只識埋怨，唔識感恩，你自己去山邊搭間木屋先啦」
但隨即有網民就指其想法等於令小朋友受苦：「點解要咁害個小朋友？小朋友無得揀出唔出世，但大人有得揀生唔生，生個小朋友出黎(嚟)受苦嘅人係咩心態」，而有網民更認為冇良好條件下生小朋友係為了養兒防老：「現實好多都係養兒防老，睇下(吓)會唔會老實講出口姐(啫)，未必係金錢上，而係唔想老左(咗)冇人理冇人打點啲野(嘢)」、「真，世界上咁多悲慘人生，就係因為窮人生仔，要生佢出黎(嚟)受苦，打份牛工追樓價，真係好x街，要生黎(嚟)養兒防老，仲x街 」
亦有網民認為子女有個人房間並非必需，子女不應因為沒有屬於自己的房間而埋怨。
text/Jonathan
photo/HKET圖片庫
============
同場加映：
【家居達人】跟家居維修義工隊上門！搶救廁所外牆滲水+更換霉爛電掣面板
港生活人氣本地熱話
↓【限時搶⚡】原箱高鈣梳打餅↓
↓黑芝麻 / 芥末味｜口感香脆、高鈣健康↓
【社群送禮🌸】送您麒麟一番搾啤酒及「和風櫻花禮品套裝」！
↓簡單一步登記贏禮物！↓
